Neðst á síðunni er hægt að sækja fundarsköpin í Wordskjali.

Fundarsköp fyrir Kennarafélag Reykjavíkur.

I. Fundarsetning.

1. grein
Formaður setur fund og stjórnar honum þar til fundarstjóri hefur verið kosinn.
 
2. grein
Að lokinni kosningu tekur fundarstjóri þegar við störfum, lætur fara fram kosningu varafundarstjóra og tveggja fundarritara og kynnir þá dagskrá er fyrir fundinum liggur.

II. Verksvið fundarstjóra og umræður.

3. grein
Fundarstjóri stjórnar fundum. Vilji hann taka þátt í umræðum skal hann láta varafundarstjóra taka við fundarstjórn á meðan. Rísi ágreiningur um fundarsköp gildir úrskurður fundarstjóra.

4. grein
Fundarstjóri skal gefa mönnum orðið í sömu röð og þeir hafa kvatt sér hljóðs. Ef fleiri en einn kveða sér hljóðs samtímis úrskurðar fundarstjóri í hvaða röð þeir skulu taka til máls. Ræður skal að jafnaði flytja úr ræðustóli nema fundarstjóri heimili annað. Fundarstjóra er leyfilegt að takmarka tíma ræðumanna með samþykki fundarmanna.

5. grein
Fundarstjóri skal gæta góðrar reglu á fundum. Ef ræðumaður heldur sig ekki við umræðuefnið eða viðhefur ótilhlýðileg orð varðar það áminningu frá fundarstjóra sem þá hefur vald til að taka orðið af ræðumanninum.

6. grein
Eigi má, nema með leyfi fundarstjóra, lesa upp prentað eða skrifað mál annað en nefndarálit og tillögur fundarmanna.

III. Tillögur og afgreiðsla þeirra.

7. grein
Tillögur skal leggja fram skriflegar og undirritaðar af flutningsmanni/ flutningsmönnum og afhenda fundarstjóra, sem kynnir þær fundarmönnum eins fljótt og kostur er. Bera skal þær undir atkvæði í sömu röð og þær hafa verið lagðar fram ( sbr. þó 11. gr. ). Séu fleiri en ein tillaga í sama máli skal þó fyrst bera upp þá tillöguna sem lengst gengur.

8. gr.
Breytingartillögu skal bera upp á undan aðaltillögu. Breytingartillögu sem kollvarpar eða breytir aðaltilgangi annarrar tillögu má ekki taka til greina.

9. gr.
Breytingartillögur um að fella úr, bæta í eða auka við tillögu skal bera upp þannig að lesa fyrst upp aðaltillöguna óbreytta, því næst breytingarnar og loks aðaltillöguna eins og hún yrði með breytingunum.
 
10. gr.
Fundarstjóri hefur heimild til að bera tillögu upp í tveimur eða fleiri liðum en þó því aðeins að hver liður sé sjálfstæður og að skiptingin geri tillöguna ekki óljósa.

11. gr.
Forgangstillögur eru og í þessari röð:

1. Tillaga um að ganga þegar til atkvæða.

2. Tillaga um að vísa máli frá.

3. Tillaga um að taka fyrir næsta mál á dagskrá.

4. Tillaga um að fresta máli.

5. Tillaga um að vísa máli til annars valds.

Tillögu undir 1. tl. má ekki ræða.

12. gr.
Tillögu, sem hefur verið felld, má ekki bera aftur upp á fundinum undir sama dagskrárlið. Þó má taka málið upp á ný síðar á fundinum með samþykki 2 / 3 greiddra atkvæða.

13. gr.
Heimilt er tillögumanni að taka aftur tillögu á hvaða stigi máls sem er, en öðrum fundarmönnum er heimilt að taka hana upp á ný til umræðu og afgreiðslu.

 
IV. Kosningar og atkvæðagreiðsla.

14. gr.
Atkvæðagreiðsla fer fram með handauppréttingu. Leynileg atkvæðagreiðsla fer fram, ef þess er óskað.Einfaldur meirihluti ræður úrslitum máls nema öðruvísi sé ákveðið í lögum eða þingsköpum KFR.

15. gr.
Þegar kosning er bundin má ekki kjósa aðra en þá sem tilnefndir hafa verið. Ef tveir eða fleiri fá jafnmörg atkvæði ræður hlutkesti úrslitum.

16. gr.
Atkvæðaseðill er ógildur ef á honum eru nöfn manna sem ekki eru í kjöri eða ef ekki eru greidd atkvæði jafnmörgum mönnum og kjósa á. Auður seðill telst til greiddra atkvæða.

17. gr.
Kosning stjórnar KFR fer samkvæmt 5. gr. félagslaga.

18. gr.
Fundarsköpum þessum má aðeins breyta á aðalfundi KFR með 2 / 3 hluta atkvæða þeirra sem á fundinum eru, enda hafi fyrirhuguð breyting verið auglýst í fundarboði.