Það er rétt að byrja á því að minna á að ekki er sama hvort um er að ræða undirbúningsdaga á eða utan starfstíma skóla og oft gætir misskilnings um hvernig vinnutíma er háttað þessa daga.

Undirbúningsdagar grunnskólakennara undir stjórn skólastjóra skulu vera samtals 8 fyrir upphaf og eftir lok skóladaga nemenda. Undirbúningsdagar á starfstíma skóla eru 5. Skólum er heimilt að fella þá inn í vikulegt vinnuskipulag að hluta eða öllu leyti.

Þegar meta á vinnuskyldu kennara á undirbúningsdögum á starfstíma skóla þarf að skoða hve margar kennslustundir viðkomandi á að kenna þann daginn. Jafnframt þarf að skoða hvaða öðrum störfum hann átti að sinna samkvæmt vinnuramma dagsins. Hver kennslustund reiknast þá sem 1 klukkustund í vinnuskyldu, þannig að sá sem átti að kenna 5 kennslustundir á að skila 5 klukkustunda vinnu auk þess tíma sem fyrirfram var gert ráð fyrir að kennarinn skilaði í önnur störf þann daginn.

Kennarar í hlutastarfi eiga að sama skapi vinnuskyldu á undirbúningsdögum í samræmi við vinnuskyldu dagsins ( kennsla + önnur störf ). Hafi hlutastarfsmaður engan vinnuramma á undirbúningsdegi ber honum engin vinnuskylda þann dag. Krefjist skólastjóri þess að viðkomandi mæti til vinnu ber að greiða honum tímamælda yfirvinnu, 3 klst. að lágmarki.

Það er því einstaklingsbundið hve langur vinnudagurinn verður hjá hverjum og einum en vinnuskyldan verður þó að rúmast innan dagvinnumarkanna, þ.e. milli kl. 8 og 17.