Fyrirhugað er að samrekinn leik- og grunnskóli fyrir 1.-4. bekk, ásamt frístundaheimili, taki til starfa í Úlfarsárdal í ágúst 2010. Tillögur þessa efnis hafa verið samþykktar í þremur ráðum Reykjavíkurborgar, leikskólaráði, menntaráði og íþrótta- og tómstundaráði. Í því felst spennandi tækifæri í sveigjanleika milli skólastiga og samþættingu skóla- og frístundastarfs.

Lagt er til við framkvæmda- og eignaráð borgarinnar að í þessu skyni verði sem fyrst hafin bygging húsnæðis við Úlfarsbraut 118-120, sem hugsuð var sem framtíðarhúsnæði leikskóla í hverfinu. Byggingin er hönnuð sem 5-6 deilda leikskóli á 5.350 m2 lóð og hentar því einnig vel fyrir starfsemi yngstu bekkja grunnskóla.

Við hönnun byggingarinnar var haft í huga að umhverfið gegnir stóru hlutverki í uppeldi og menntun barna. Umhverfið innan húss er því skipulagt með það í huga. Það umhverfi sem börnunum er boðið er í senn öruggt, hvetjandi, aðlaðandi, verndandi og fallegt. Rýmið er sveigjanlegt á þann hátt að hægt er að stækka og minnka það eftir þörfum. Einnig er hugsað fyrir mismunandi aldri barnanna og miðað við stærð þeirra og þarfir.

Reiknað er með 40-50 börnum á leikskólaaldri á fyrsta starfsári skólans og svipuðum fjölda grunnskólabarna í 1.-4. bekk. Gert er ráð fyrir að skólinn „eldist“ með börnunum s, þ.e. að árlega bætist einn árgangur við í skólastarfinu, jafnhliða því sem börnin verða eldri.

Með samþykkt tillögunnar nýtist fjármagn til varanlegrar uppbyggingar. Leikskólinn fer strax í endanlegt húsnæði og starfsemi grunnskólans verður á sama svæði og fyrirhugaður grunnskóli og íþróttasvæði. Jafnframt gefst spennandi tækifæri til samreksturs leikskóla, grunnskóla og frístundaheimilis í Reykjavík sem er í samræmi við áherslur Reykjavíkurborgar í menntamálum og ný lög um leik- og grunnskóla. Fjármögnun vegna þessa er innan „gildandi” 3ja ára áætlunar vegna leikskóla og grunnskóla í Úlfarsárdal.