Til borgarstjóra Reykjavíkur, Hönnu Birnu Kristjánsdóttur

Ályktun frá almennum starfsmannafundi í  Langholtsskóla 14. 04. 2009, vegna fjárhagsáætlunar Reykjarvíkurborgar fyrir 2009.
Þriðjudaginn 31. mars 2009  var fjárhagsáætlun Reykjavíkurborgar fyrir árið 2009 samþykkt. Í tölvubréfi frá borgarstjóra til starfsmanna borgarinnar, dagsettu 3.04.2009 stendur: „...Endurskoðuð fjárhagsáætlun fyrir árið 2009 var samþykkt á fundi borgarstjórnar síðastliðinn þriðjudag. Markmiðum hagræðingar var náð og var því fagnað sérstaklega.“

Á heimasíðu Reykjavíkurborgar (http://www.rvk.is/desktopdefault.aspx/tabid-1066/521_read-14636/, fréttatorgi 1.04.2009 ), birtist eftirfarandi frétt frá borgarstjórn: „...Markmið við endurskoðun fjárhagsáætlunar var að hagræða um rúma 2,3 milljarða kr. í samræmi við samþykkta fjárhagsáætlun og með því að standa vörð um grunnþjónustu við íbúa borgarinnar, störf borgarstarfsmanna og gjaldskrár. Þessi markmið hafa nú náðst og er því fagnað sérstaklega, um leið og öllu því fjölmarga starfsfólki Reykjavíkurborgar sem kom að vinnunni er þakkað fyrir vel unnin störf.“ 
Á starfsmannafundi sem haldinn var í Langholtsskóla 14. 04. 2009 kynnti skólastjóri fyrirhugaðar aðgerðir sem grípa þarf til vegna nýsamþykktrar fjárhagsáætlunar. Skólum borgarinnar verður gert að skera umtalsvert niður. Í Langholtsskóla lítur út fyrir að hópur fastráðinna starfsmanna, sérstaklega kennara, missi störf sín frá og með næsta hausti.
Augljóst er að þessu gefnu að borgarstjórn Reykjavíkur hefur ekki staðið vörð um störfin í borginni. Starfsmenn Langholtsskóla lýsa furðu sinni á ósamræmi milli aðgerða sem grípa þarf til vegna fjárhagsáætlunarinnar og orða borgarstjórnar og borgarstjóra um að markmiðum hafi verið náð. Við krefjumst skýrra svara með hvaða hætti störfin verða varin.

Samþykkt einróma á fundi starfsmanna Langholtsskóla.